Vár samskipar hjálparátøk í Kenja

Altjóða starvsfólkið hjá Reyða Krossi Føroya, Vár í Dali, hevur ein týðandi leiklut sum humaniterur ráðgevi og samskipari í hjálparátøkum í Kenja. Umvegis altjóða deildina í Keypmannahavn, arbeiðir Vár eitt nú við at samskipa átøk í samstarvi við Reyða Kross í Kenja, sum røkir týðandi hjálpartænastur í tøttum samstarvi við kenjanskar heilsumyndugleikar.

Koronafarsóttin er bæði ein váði fyri fólkaheilsuna í økinum, men er eisini ein humaniter avbjóðing fyri menningarlond, har trygdarnet og heilsumyndugleikar framanundan eru undir stórum trýsti vegna náttúruvanlukkur, veðurlagsbroytingar og kríggi.

Reyði Krossur í Kenja, hevur ein umráðandi leiklut í at avmarka koronafarsóttina millum borgararnar í landinum, og arbeitt verður tætt saman við heilsumyndugleikunum í landinum innan øki, sum sálarheilsu og psykososialan stuðul (PSS). Ein liður í verkætlanararbeiðinum er at veita upplæring og venjing innan sálarheilsu og psykososialum stuðli.

Reyði Krossur Føroya hevur valt at lata kr. 650.000 til humaniterar verkætlanir í Kenja.