Varðhaldsfongslað í fýra vikur í stórum rúsevnismáli

Fimm fólk, sum seinnapartin í gjár vórðu handtikin í stórum rúsevnismáli, eru varðhaldsfongslað í fýra vikur meðan málið verður kannað.

Tað veit útvarpið.

Grundlógaravhoyring var seinnapartin, og fólkini eru skuldsett fyri at smugla sløk 27 kilo av rúsevnum til Føroya. Løgreglan hevur lagt hald á 23 kilo av hassji og 3,8 kilo av amfetamini.

Talan er um eina kvinnu úr Íslandi, eina kvinnu og tveir menn úr Danmark og so ein føroying.

Virði á smuglaðu rúsevnunum liggur um einar tíggju milliónir sambært prískunning, sum útvarpið fekk frá løgregluni í 2021.