Ógvusligt avfall hevur verið í amerikanska stórbýnum New York. So nógv regn er komið niður, at so at siga allar undirgrundstoklinjurnar standa undir í vatni, og tí koyra ongi tok í løtuni, skrivar New York Times.
Illveðrið hevur fingið borgarstjóran í býnum, Bill de Blasio, til at lýsa býin í neyðrættarstøðu.
- Vit eru í eini søguligari veðurstøðu í kvøld við metstórum mongdum av regni í øllum býnum, ógvusligum vatnflóðum og vandamiklari støðu úti á vegunum, skrivaði hann á Twitter beint fyri midnátt í gjárkvøldið, lokala tíð.
Tað eru leivdirnar av ódnini Ida, ið skapa trupulleikar í stórbýnum. Ida legði leiðina norðureftir eftir at hon sunnukvøldið rakti statin Louisiana. Hetta hendi bert eina góða viku eftir at ódnin Henri eisini elvdi til at bæði vegir og metrostøðir í New York floymdu yvir.
BBC skrivar, at ein persónur hevur latið lív orsaka av storminum. Hetta hendi í Passaic í New Jersey. Eisini eru minst níggju heim oyðiløgd í býarpartinum Mullica Hill, eisini í New Jersey.
Amerikanska veðurstøðin máldi 8 sentimetrar av regni innan fyri ein tíma í Central Park í New York.
(Mynd: EPA)
Vinarliga broyt tínar kennifíla - og privatlívsstillingar fyri at síggja hetta innihald