Vatnið enn dálkað í meginpartinum av høvuðsstaðnum

Mikudagin vórðu fólk í Havn mæld til at kóka drekkivatnið, av tí at bakteriur vórðu staðfestar í vatninum.

Í dag boðar Tórshavnar kommuna frá, at enn vórðu smáar nøgdir av bakterium staðfestar í vatninum frá vatnverkinum í Villingadali, tá royndir vórðu tiknar í gjár. Tí stendur kókitilmælið enn við.

Men vatnið úr Havnardali er reint, og tí nýtast fólk í vesturbýnum og á Argjum ikki longur at kóka vatnið.

Ein nýggj roynd er tikin, og úrslitið fyriliggur mánadagin, og tá fæst meira at vita, sigur kommunan.