Verður liðugt áðrenn páskir

Umvælingin av Klaksvíkar Hermetik fór í gongd í heyst, og orsakað av eitt nú sera vánaligum veðri í vetur, hevur arbeiðið drigið nakað út, men nú er ferð komin á arbeiðið.

Tað skrivar Klaksvíkar kommuna, sum roknar við, at umvælingin verður liðug áðrenn páskir.

Bygningurin er bygdur í fleiri stigum, har elsti parturin varð bygdur í 1930unum og er á varðveitingarlistanum hjá kommununi.

Arbeiðið at klæða bygningin er komið væl áleiðis, og so skjótt sum veðrið verður betri, verður farið undir at bjálva og leggja tak á. Harumframt eru øll vindeygu og allar hurðar skiftar. Við hesum verður bygningurin settur í uppruna stand og snið, skrivar kommunan.

Kostnaðurin fyri arbeiðið er beint omanfyri tríggjar milliónirkrónur.