Vesturlendsk lond flutt 111.000 fólk úr Afghanistan

Um tríggjar dagar – 31. august – skulu vesturlendsku londini vera liðug við at flyta fólk úr Afghanistan, og seinastu tvær vikurnar eru yvir 100.000 fólk flutt úr landinum.

Sambært uppgerð frá tíðindastovuni Reuters, hava vesturlendsku londini flutt 111.000 fólk úr Afghanistan síðan 14. august, ið er dagurin áðrenn Taliban tók valdið í Kabul.

DR hevur endurgivið tøl frá nøkrum útvaldum londum, og upplýst verður m.a., at USA hevur flutt 5.100 amerikanskar ríkisborgarar úr Afghanistan, og Stórabretland hevur flutt 13.700 bretar og afghanarar úr landinum. Svøríki hevur flutt 1.100 persónar úr landinum, meðan talið hjá Danmark er 988.