Viðlíkahalda Føroyar í mai

Um vikuskiftið 2. til 4. mai vera sjálvboðin aftur at síggja kring landið í sambandi við "Closed for Maintenance, Open for Voluntourism" átakið, sum Visit Faroe Islands skipar fyri saman við kommunum og kunningarstovum kring landið.

Átakið var fyrstu ferð í 2019, hetta er sostatt sættu ferð verkætlanir verða kring landið. Áhugin hjá føroyingum at vera við hevur verið stórur, og aftur í ár bjóða vit 40 sjálvbodnum føroyingum at verða partur av átakinum. Sum nakað nýttt hava vit lagt ein arbeiðsdag aftrat vikuskiftinum.

Arbeiði fer í høvuðsheitum at snúgva seg um at gera gøtur, laga varðar, at seta vegvísarar upp v.m., so tað verður tryggari og lættari at ferðast í Føroyum. Summar verkætlanir eru framhald av arbeiðinum ið varð framt í fjør. Tær átta verkætlanirnar sum vera við í ár, verða nærri lýstar her.

Ongi krøv eru sett um serligar førleikar. Einasta treyt er, at tey sjálvbodnu tíma at arbeiða hart í tveir og ein hálvan dag. Tey sjálvbodnu sum eru við í verkætlanini fáa bjóðað gisting og mat afturfyri arbeiðsdagarnar ið enda við eini veitslu.

Tilmeldingin fer fram á heimasíðuni hjá Visit Faroe Islands. Freistin at tekna seg er týsdagin 2. apríl á midnátt, ella tá ið einki pláss er eftir.

(Mynd: Visit Faroe Islands)