Virðið á Bitcoin Suisse er nú 2,1 milliardir krónur

Bitcoin Suisse, fyritøkan hjá Niklas Nikolajsen, hevur nú eitt virði á 2,1 mia. krónur, eftir at íleggjarar hava sett 311 mió. krónur í fyritøkuna.

Fyritøkan hevur seinastu árini havt eitt samlað yvirskot á 347 mió. krónur, og í fyrru helvt av 2020 hevði fyritøkan eisini havt eina góða menning.

Ævintýrið hjá 45 ára gamla Niklas Nikolajsen, sum er ættaður úr Føroyum, byrjaði í 2011, tá hann keypti bitcoins fyri undir 50 cent. Nøkur ár seinni var Niklas millióningur.

Í 2013 stovnaði hann Bitcoin Suisse, ein fyritøka, sum hjálpir ríkfólk við at gera íløgur í kryptovaluta. 

Niklas Nikolajsen sigur við Finans.dk, at fyritøkan, sjey ár eftir hon varð stovnað, er væl ávegis at gerast fyrsta evropeiska "Unicorn" í sínari vinnugrein.

"Unicorn", ið á føroyskum nevnist einhyrningur, er orð, sum verður brúkt at lýsa eitt nýstovnað felag, sum røkkur eitt marknaðarvirði á meira enn ein mia. dollarar.

Hvussu stórur umsetningurin hjá Bitcoin Suisse er, verður ikki avdúkað, men upplýst verður, at talan er um mia.

Dagførd 26. juli kl. 11.18