Ingi Samuelsen
Stjórnin hjá Vladimir Putin villeiðir russar um, hvussu tað gongur við ukrainsku mótálopunum í krígnum. Tað heldur ovastin fyri privata russiska Wagner-leiguherin, Jevgenij Prigozjin, sambært Ritzau.
Russiski forsetin hevur aftur og aftur sagt, at ukrainska álopið er miseydnað.
Men Prigozjin, hvørs menn í mánaðir hava verið í bardaga um býin Bakhmut har eysturi í Ukraina, ákærir nú russiska verjumálaráðið fyri ikki at siga sannleikan.
- Tey villeiða russiska fólkið, sigur hann í einum ljóðboðum á tænastuni Telegram.
Sambært Wagner-leiðaranum, hava russisku deildirnar eitt nú mist tamarhaldið á fleiri bygdum, sum ukrainskar deildir hava hertikið aftur.
Vladimir Putin segði í gjár, sambært Ritzau, at Ukraina hevði verið fyri “stórum ósigrum”.
Frá ukrainskari síðu hevur stjórnin boðað frá framgongd. Átta bygdir, sum hava verið undir russiskum valdi, eru afturtiknar, ljóða boðini.
Í morgun frættisr um, at ukrainskar deildir hava bumba eina brúgv, sum bindir Krim hálvoynna við Kherson-økið.
Tað boðaðu russisk embætisfólk frá, sambært Reuters.
Vladimir Saldo, sum er russiskt-innsettur guvernørur í Kherson, sigur at talan helst var um eitt rakettálop.
Hann sigur at vegbreytin hevur fingið skaða, men at ongin mannskaði hevur verið.
Vinarliga broyt tínar kennifíla - og privatlívsstillingar fyri at síggja hetta innihald