Ingi Samuelsen
Heimsheilsustovnurin WHO flytir sína evropeisku skrivstovu fyri ikki-smittandi sjúkur úr Moskva til ST-býin í Keypmannahavn.
Tað upplýsir danska ráðkvinnan við innanríkis- og heilsumálum, Sophie Løhde í tíðindaskrivi.
Tað eru limalondini í evropeiska partinum av felagsskapinum, sum hava tikið avgerðina, ráðkvinnan og upplýsir, at talan var um eina neyðuga avgerð.
- Við harðrendu framferðini og innrásini av Ukraina, kunnu vit ikki hava eina týðandi WHO-skrivstovu í Moskva, sigur hon í tíðindaskrivinum.
Evropeiska høvuðsskrivstovan hjá felagsskapinum liggur frammanundan í danska høvuðsstaðnum.
Enn er avgerð ikki tikin nær virksemið verður flutt, upplýsir ráðið fyri Ritzau tíðindastovuni.
Skrivstovan arbeiðir fyri at betra um fyribirging og viðgerð av ikki-smittandi sjúkum, so sum diabetes, krabbameini og hjartaæðrasjúkum.
Endamálið er at minka um talið av deyðum orsaka av ikki-smittandi sjúkum við einum triðingi innan 2030.
Felagsskapurin er býttur upp í seks ymiskar skrivstovur. Danmark er við í evropeiska partinum, sum hevur 53 limalond.
WHO varð stovnað í 1948 og hevur 194 limalond tilsamans.
Vinarliga broyt tínar kennifíla - og privatlívsstillingar fyri at síggja hetta innihald