Yvir 20.000 fólk eru nú smittað

Seinasta samdøgrið hevur coronavirusið kravt 64 mannalív í Hubei-landspartinum í Kina.

Hetta er størsta talið innan eitt samdøgur, síðan coronavirusið fyrst varð staðfest, og sostatt er talið á deyðum í Hubei nú komið upp á 414.

Samlaða deyðstalið í øllum Kina er 425, men tey flestu eru skrásett í Wuhan, ið er størsti býur í Hubei-landspartinum, har coronavirusið eisini stavar frá, skrivar Ritzau.

Seinasta samdøgrið eru eisini 3.235 nýggir tilburðir av virusinum skrásettir í Kina, har talið á smittaðum nú er komið uppá 20.438.

Heimsheilsustovnurin WHO hevur lýst coronavirusið sum eina altjóða heilsukreppu, og sjúkan er higartil staðfest í fleiri enn 20 londum.