Zelenskyj: 31.000 ukrainsk herfólk latið lív undir krígnum

31.000 ukrainsk herfólk hava latið lív í krígnum móti Russlandi.

Tað upplýsti ukrainski forsetin, Volodymyr Zelenskyj um vikuskiftið í sambandi við, at tvey ár vóru liðin, síðan kríggið byrjaði.

Hetta er fyrstu ferð, at ukrainski forsetin úttalar seg um, hvussu nógv herfólk hava latið lív í Ukraina.

– 31.000 herfólk eru deyð í krígnum, segði ukrainski forsetin sambært Ritzau.

– Hvørt einasta av hesum tapunum er eitt stórt tap fyri okkum.

Talið, sum Zelenskyj hevur upplýst, er tó ikki váttað av óheftum keldum.

Í november metti ein sivilur ukrainskur kanningarbólkur, at fleiri enn 30.000 ukrainsk herfólk høvdu latið lív undir krígnum. Nakarar mánaðir frammanundan mettu amerikonsk embætisfólk at talið var nær við 70.000.

Í januar mettu tíðindafólk hjá russiska MediaZona og russiska deildin hjá BBC, at í minsta lagi 42.284 russisk herfólk høvdu latið lív undir krígnum. Russland hevur ikki almannakunngjørt nakrar upplýsingar um hetta.

Sambært uppgerðum frá ST hava í minsta lagi 10.000 sivilfólk latið lív í Ukraina undir krígnum. Harumframt verður mett, at nærum 20.000 sivilfólk eru særd.