Zelenskyj: Eingin veit, hvat hendi

Tá tíðindini bórust um, at ein rakett hevði rakt pólsku bygdina Przewodow, ið liggur umleið 12 kilometrar frá ukrainska markinum, vóru ukrainar skjótir at geva russum skyldina, men nú sigur ukrainski forsetin, Volodymyr Zelenskyj, at eingin veit við vissu, hvat tað er, sum er hent.

M.a. Nato hevur sagt, at ongar ábendingar eru um, at rakettin varð skotin úr Russlandi, ella at talan skuldi vera um eitt tilvitað álop á Pólland. Fleiri lond hava eisini víst á, at rakettin kann stava frá ukrainsku loftverjuni, sum hevur til endamáls at verja móti russiskum rakettálopum.

Hóast Zelenskyj nú ásannar, at tey ikki heilt eru greið yvir, hvat er farið fram, sigur hann tó framvegis, at talan var um eina russiskt-framleidda rakett.

Ukrainar hava kravt atgongd til vanlukkustaðið, og hava tey eisini sóknast eftir prógvum fyri, at rakettin skuldi stava frá ukrainsku loftverjuni.

Ukrainskir serfrøðingar eru nú farnir til Póllands, har pólsk og amerikonsk kanningarfólk eru í ferð við at kanna staðið, sigur ukrainski uttanríkismálaráðharrin, Dmytro Kuleba sambært DR.