– Ein hóttan so nær við okkara landamørk kann ikki góðtakast

9. mai er sigursdagur í Russlandi, ein tjóðarhalgidagur, har Russland markerar, tá Sovjetsamveldið sigraði yvir Nasitýskland undir seinna heimsbardaga í 1945.

Hetta verður hátíðarhildið við stórari skrúðgongu á Reyða Torginum í høvuðsstaðnum, Moskva, og í dag var einki undantak.

Nógvar gitingar hava verið um, hvussu Vladimir Putin fór at umrøða støðuna í Ukraina í røðu sínari, og ein partur av røðuni hjá russiska forsetanum snúði seg eisini um núverandi støðuna, skrivar Ritzau.

Putin segði m.a., at Russland noyddist at fremja "serliga hernaðaratgerðina" í Ukraina, sum kríggið verður nevnt í Russlandi. Har er tað nevniliga bannað at umrøða tað, sum fer fram í løtuni, sum eitt kríggj ella eina innrás.

– Russland kann ikki góðtaka, at Nato savnar megi nærindis russiska markið, segði Putin.

– Ukrainska stjórnin boðaði frá møguligari tilognan av kjarnorkuvápnum, og Nato fór í holt við eina hernaðarkolonisering í økjum, sum hoyra saman við okkum. Tað kann yvirhøvur ikki góðtakast, at ein hóttan kemur so nær okkara landamørk.

Putin vildi í røðu sínari eisini vera við, at vesturheimurin fyrireikaði eina innrás av russiskum økjum, harímillum Krim-hálvoyggin, sum Russland hertók í 2014.