32 fólk í sóttarhaldi

Eftir at tveir føroyingar hava fingið staðfest corona-virusið, eru nú í alt 32 fólk avbyrgd, sigur Heilsumálaráðið í tíðindaskrivi í kvøld.

Tað er Lars Fodgaard Møller, landslækni, sum ger av, hvussu nógv skulu avbyrgjast. Mannagongin er, at landslæknin kannar teir persónar, sum tey smittaðu hava verið í sambandi við.

Tey flestu eru avbyrgd heima við hús, meðan níggu teirra halda til á Hotel Vágum.

Føroysku heilsumyndugleikarnir komu í kvøld við tilmæli um, at tiltøk har fleiri enn 500 fólk savnast eiga at verða avlýst. 

- Ansið eftir hvørjum øðrum, so avmarka vit útbreiðsluna av smittuni. Størsta týdning er at verja okkara eldri og veiku borgarar, segði Kaj Leo Holm Johannesen, landsstýrismaður.