Ingi Samuelsen
Løgreglan hevði úr at gera við at taka ímóti fráboðanum um vindskaðar í ódnarveðrinum í gjár.
Løgreglan tók ímóti ikki færri enn 95 fráboðanum frá klokkan hálvgun átta í gjáramorgunin til klokkan eitt í nátt.
Eftir klokkan eitt stilnaði av, og restin av náttini var friðarlig hjá løgreglufólkunum.
- Eg kann bara siga tær, hvat kom inn til okkara. Men eg eri vísur í, at tað hava verið nógvir vindskaðar, sum vit á løgreglustøðini ikki hava fingið fráboðan um. Eg veit, at tað eru nógv fólk, kanska mest á smáplássum, sum heldur ringja beinleiðis til fólkini íbjargingarfelagnum at leita sær hjálp, heldur enn at ringja til okkara fyrst.
- So tað er ómøguligt hjá mær í dag at siga júst hvussu nógvir vindskaðar vóru í gjár og í gjárkvøldið, sigur Bjarni Nattestad, vaktleiðari hjá løgregluni.
Ógvuligastu fráboðanirnar í gjár komu úr Vágum, Havn, Strondum og Klaksvík. Fleiri tekur hava rivið og onkrastaðni er onkur trom farin omanav.
Í Vágum reiv tekjan á skúlanum á Giljanesi, í Sandavági hendi skaði á vakstrarhúsið og í Sørvági tekjan á Svimjihøllini.
Á Selatrað loysnaði ein flótibrúgv og í Hvalba sleit ein aliflaki.
Í Klaksvík fóru eisini fleiri tekjur og onkur yvirtrom. Eitt nú fór ein partur av tekjuni í gomlu Spaniastovu, meðan Rani Nolsøe hevði útgávukonsert.
Sí upptøkur av hendingini á Norðlýsinum
Í Havn hevur kommunan stongt ein part av ringvegnum úti við Strond, tí eyrur og annað tilfar er skolað og fokið heilt niðan á vegin í uppganginum.
Sambært vakthavandi hjá løgregluni var støðan allar ringast í gjár millum klokkan 16 og 18, so stilnaði nakað av aftur fyri aftur at bresta á út móti midnátt.
Í løtuni er ein skái, men veðurfólkini boða frá meira vindi aftur seinni í dag.
Løgreglan heitir á fólk um at brúka skáan til at skoða umstøðurnar uttanfyri, eitt nú at surra leysar lutir og vita um húsini hava fingið skaða.
- Hóast einki er farið í storminum í nátt, so kann tað so lættliga henda seinni í dag, um okkurt er byrjað at loysna, sigur vaktleiðarin.
Vinarliga broyt tínar kennifíla - og privatlívsstillingar fyri at síggja hetta innihald