Amnesty: Nýggj prógv funnin um at Russland leypur á sivilfólk

Listin við prógvum fyri, at Russland hevur brúkt ólóglig vápn móti ukrainskum sivilfólki í Ukraina bara veksur. Tað sigur mannarættindafelagsskapurin Amnesty International í tíðindaskrivi.

M.a. hevur Russland brúkt minur, sum eru gjørdar til at raka fólk, í sivilum økjum í og kring býin Kharkiv.

– Íbúgvar Í Kharkiv hava verið útsettir fyri miskunnarleys og tilvildarlig álop seinastu mánaðirnar. Fólk eru vorðin dripin í heimi teirra og á gøtunum, á spæliplassum og kirkjugørðum, í bíðirøð fyri at fáa neyðhjálp ella tá tey hava verið til handils eftir mati og heilivági, verður sagt í tíðindaskrivi frá Amnesty.

Kharkiv, ið liggur í landnyrðingspartinum av Ukraina, er næststørsti býur í landinum. Kharkiv hevur fleiri ferðir verið undir álopi, og byrjaði hetta longu síðst í februar mánað.

Sambært Ritzau hava lokalu heilsumyndugleikarnir upplýst fyri Amnesty, at 606 sivilfólk hava latið lív í russiskum álopum í Kharkiv, og 1.248 eru vorðin særd.

Amnesty hevur kannað 41 álop, og hevur felagsskapurin í hesum sambandi gjørt samrøður við 160 offur í apríl og mai. Talan er um offur, vitni og læknar, sum hava hjálpt teimum særdu.

Russland hevur fyrr víst aftur, at tey hava rakt sivilfólk í sambandi við tað, sum russiska stjórnin rópar "ein serliga hernaðarlig atgerð".

Fyri tveimum mánaðum síðani ferðaðust myndir runt í altjóða miðlum av líkum, sum lógu á gøtuni í ukrainska býnum Butja. Her sigur Amnesty seg eisini hava funnið prógv fyri, at Russland hevur framt krígsbrotsverk.