Tíðindaskriv
Tað serstaka tónlistaverkið “From Harbour to Harbour” eftir føroyska tónaskaldið Onnu Katrin Egilstrøð verður framført í Norðurlandahúsinum hóskvøldið 25. januar.
“From Harbour to Harbour” bjóðar áskoðarunum við umborð á ta kosmisku kusuna, á eina innaru ferð gjøgnum eitt umfevnandi, vekjandi ljóðhav. Verkið er ein tónlistarlig sýning, ið fabulerar um vatn sum samband millum menniskju og aðrar kroppar av vatni.
Anna Katrin Egilstrøð hevur skrivað verkið til donsku NJYD kvartettina. Hon samantvinnar ta serligu instrumenteringina hjá kvartettini við framførslu, teksti, sangi og multikanalelektronikki. Tær instrumentalu røddirnar eru gjørdar í samstarvi við tónleikararnar, sum saman við tónaskaldinum, hava kannað og upptikið ljóðið av ljóðførunum í samanbresti við ymisk støð í Føroyum og Aarhus.
Anna Katrin Egilstrøð er útbúgvin elektroniskur komponistur á Det Jyske Musikkonservatorium, hon arbeiðir bæði við elektroniskari og klassiskari kompositión, og arbeiðir tvørtur um listagreinar. Hon hevur m.a. skrivað, framført og útgivið tað symfoniska verkið “BEINTA”, sum hon skrivaði við danska tónaskaldinum Allan Gravgaard Madsen, og í Føroyum er hon kanska mest kend sum songkvinna í bólkinum Valravn.
Konsept, kompositión og performari: Anna Katrin Egilstrøð
Floyta: Marie Sønderskov
Saxofon: Anja Nedremo
Guitar: Mikkel Egelund
Slagverk: Jonas Weitling
Búnar: Jón Sonni Jensen, Trina Gaard, Anna Katrin Egilstrøð
Grafisk mynd: Jón Sonni Jensen og Anna Katrin Egilstrøð
Stuðlað hava: Statens Kunstfond, Koda kultur, Augustinus Fonden, William Demant Fonden, Århus Music City, Tórshavnar kommuna, Loftflog og Mentanargrunnur Landsins.
Norðurlandahúsið, hóskvøldið 25. januar kl. 19.30
Vinarliga broyt tínar kennifíla - og privatlívsstillingar fyri at síggja hetta innihald