Arbeiða gjøgnum punktini í kvøld

Fyrrapartin mikudagin sótu umboð fyri flokkarnar, trý úr hvørjum flokki, saman og samráddust um, hvørt mann skuldi skipa samgongu millum Javnaðarflokkin, Tjóðveldi og Framsókn. Seinrapartin vórðu heilar tingmanningar umframt varafólk á fundi og arbeiddu í bólkum. Bólkarnir skuldu gera uppskot til partar av einum samgonguskjali millum flokkarnar.

Í dag hava serfrøðingar verið inni og havt fakligar framløgur um ymisk evni. Sum skilst er tað ikki óvanligt, og tað verður gjørt í eini roynd at tryggja, at politiskar avtalur kunnu fremjast í verki. Samstundis hava ið hvussu so er onkrir av bólkunum gjørt seg lidnar við síni uppskot.

Og í kvøld sita so forfólkini saman við onkrum øðrum í flokkunum og gjøgnumganga arbeiðið, sum bólkarnir hava framleitt. Aksel V. Johannesen sigur við miðlarnar, at ætlanin er at gjøgnumganga alt tilfarið í kvøld, tó at hann ikki kann lova, at tað verður liðugt viðgjørt. Hann leggur afturat, at tað kann fara at vera drúgt í kvøld.

Málið hevur verið, at hann í morgin, fríggjadagin, kann siga meiri um, hvørt hesar samráðingarnar bera á mál, og tað fer at bera til at skipa landsstýrissamgongu.