Atlantic Airways og Icelandir fara at samstarva um ferðaseðlar og ferðafólk

Í gjár skrivaðu Atlantic Airways og Icelandair undir søguliga samstarvsavtalu - eina sonevnda" codeshare".

Stjórarnir í tí føroyska og tí íslendska flogfelagnum tóku í hondina á hvørjum øðrum á stóru Arctic Circle Assembly, sum í hesum døgum verður hildin í Reykjavík.

Ráðstevnan varð millum annað nýtt til at fáa avtaluna, sum skal gera tað smidligari hjá ferðafólki, endaliga undir land.

Avtalan inniber millum annað, at tað fer at bera til hjá báðum flogfeløgunum at selja ferðaseðlar á flogførunum hjá hvørjum øðrum. Hetta mekrir, at tað nú fer at bera til at keypa ein ferðaseðil beinleiðis frá Atlantic Airways úr Vágum og allan vegin til útvald ferðamál í USA og Kanada, skrivar Atlantic Airways.

- Atlantic Airways fegnast um samstarvið við okkara brøðratjóð í útnorði, sum knýtir okkum enn nærri saman. Við avtaluni styrkja vit okkara felags grundarlag, sum hevur stóran týdning ikki bara vinnuliga, men eisini sum lond. Tað er ongin loyna, at bæði USA og Kanada eru stórir marknaðir, so fyri okkum er tað ein stórur fyrimunur at gerast partur av fjølbroytta rutunetinum hjá Icelandair

Hetta sigur Jóhanna á Bergi, stjóri í Atlantic Airways í sambandi við, at avtalan varð undirskrivað.

Bogi Nils Bogason og Jóhanna á Bergi (Mynd: Atlantic Airways)

Hetta skal gera tað bæði lættari hjá útlendingum at koma til Føroyar og lættari hjá føroyingum at koma til Norðurarmerika.

- Harafturat letur avtalan letur upp fyri nógvum spennandi møguleikum bæði fyri føroyingar, sum vilja út í heim og fyri útlendingar, ið vilja koma til Føroya, tí á henda hátt verða vit bæði sjónligari uttanlands, og føroyingar fáa eisini eitt betri og samanhangandi tilboð. Við avtaluni fáa vit eisini gagnnýtt styrkirnar hjá báðum flogfeløgunum við at gera Føroyar meira atkomuligar fyri ferðafólk úr Norðuramerika, samstundis sum tað gerst einfaldari fyri føroyingar at ferðast til USA og Kanada.

Les eisini: Gevast at flúgva til New York í 2025

Bogi Nils Bogason, stjóri í Icelandair, staðfestir, at samstarvið skal vera við at styrkja møguleikarnar.

- Londini í útnorði hava tað til felags, at vit eru bundin at eini munagóðari loftbrúgv til umheimin fyri framgongd í okkara egnu londum. Við at samstarva og at fáa eina formliga avtalu, styrkja vit loftvegis sambandið í útnorði, sum er ein týdningarmikil grundarsteinur undir víðarimenning av hesum partinum av heiminum.

Skal eisini vera lættari at koma til Grønlands

Umframt at undirskriva samstarvsavtalu við Icelandair, gjørdu Atlantic Airways og Air Greenland eisini eina avtalu um at styrkja samstarvið sínámillum við eini interline-avtalu.

Eins og við codeshare, ger ein interline-avtala ferðina munandi lættari fyri ein, ið skal ferðast við meira enn einum flogfelagi, fyri at koma til sítt endaliga ferðamál, m.a. tí til ber at skrivað viðførið inn allan vegin, og tú kanst fáa øll ferðakort (boardingkort) á byrjanarflogvøllinum.

- Ein interline-avtala við Air Greeland letur upp fyri beinleiðis ferðing sama dag til og úr Nuuk via Keypmannahavn ávísar dagar í vikuni. Vit vita eisini, at tað eru nógvir føroyingar, ið sigla í Grønlandi, og hetta fer at verða ein stórur fyrimunur fyri teir, tí nú fer at bera til at ferðast til Grønlands uttan at steðga eina nátt í Keypmannahavn, sigur Jóhanna á Bergi.

Báðar avtalurnar koma eftir ætlan í gildi fyrsta ársfjórðing í 2025, skrivar Atlantic Airways at enda.