Bara ein nevndarlimur tekur undir við landsstýrinum

Løgtingið er nú farið undir aðru viðgerð av uppskotinum hjá landsstýrinum um at geva landsstýrismanninum við umhvørvis- og vinnumálum – í eitt avmarkað tíðarskeið fram til 31. mars næsta ár – heimild at steingja skeinkistøð og matstøð.

Men onki bendir á, at uppskotið fær undirtøku á tingi, tá atkvøðast skal um málið seinni í dag.

Málið hevur verið viðgjørt í vinnunevndini, har ein stórur meiriluti mælir løgtinginum frá at taka undir við at landsstýrismaðurin fær hesa tvingsilsheimild, sum tey kalla tað.

Dagliga hevur andstøðan meirilutan í júst vinnunevndini, men hesaferð er tað ein nógv størri meiriluti, sum mælir til at havna uppskotið, tí Johan Dahl úr Sambandsflokkinum og Beinir Johannesen úr Fólkaflokkinum taka í hesum føri undir við andstøðuumboðunum.

- Meirilutin metir ikki, at grundgevingarnar fyri eini lóg, ið avmarkar ein úrvaldan skarða av vinnufyritøkum, halda í mun til verju av COVID19-smittu og harmast um, at ein smidlig loysn ikki er funnin í samráð við allar viðkomandi partar, sigur meirilutin millum annað í álitinum.

Einasti vinnunevndarlimur, sum mælir løgtinginum til at samtykkja uppskotið er Christian F. Andreasen úr Fólkaflokkinum, sum á tingi inniliga heitti á tingið um at samtykkja uppskotið, tí hetta er einasti máti at hava møguleiki fyri at støðga tí nógv størstu smittukelduni, sum kann uppstanda, um koronasmittan stingur seg uppaftur í fólkinum.

Fylg tingviðgerðini her