Bara íslendingar sum vildu hava Reiley víðari

Reiley og Danmark vóru langt frá einum finaluplássi í Eurovision.

Fyrireikararnir av Eurovision hava kunngjørt atkvøðutølini fyri hálvfinalurnar sum vóru týsdagin og hósdagin, og tølini vísa, at lítið var at heinta.

Tað skrivar Danmarks Radio á heimasíðuni.

(Mynd: EPA)

25 ára gamli Rani Petersen við lagnum "Breaking My Heart" fekk bara seks stig, og øll komu frá sjónvarpshyggjarum í Íslandi.

Harvið endaði Danmark á einum 14. plássi av tilsamans 16 londum. Bara Rumenia og San Marino fingu færri atkvøður enn Danmark.

Landið sum endaði á tíggjunda plássi, Estland, og sum var nokk til at koma víðari, fekk 74 stig - altso 68 fleiri enn Reiley og Danmark.

Stóra finalan var í gjár, og tað bleiv favoritturin Loreen sum lagnum Tattoo, sum streyk avstað við sigrinum.