Christian í Grótinum keypt bygningin hjá Nema í Klaksvík

Nema fer skjótt at flyta í nýggj høli í Klaksvík. Hetta er greitt, eftir at felagið Christian í Grótinum hevur keypt bygningin á Stangavegnum, heilt har norðuri í Klaksvík, har Nema leingi hevur húsast.

Ætlanir hava leingi verið um at menna deildina í Klaksvík og at flyta hana longur heim í býin, sigur Gudny Langgaard við Norðlýsið í dag.

- Tað hevur ikki verið lætt at funnið nakað hóskandi hjá okkum at flyta inn í, sum er meira ásýniligt í handilslívinum í Klaksvík, men nú hava vit funnið eina nøktandi loysn. Vit síggja stórar møguleikar í at menna okkara virksemi her á staðnum, sigur stjórin í Nema. 

Tað er ikki greitt enn, hvat Christian á Grótinum fer at nýta bygningin til. Talan er um eina íløgu.