Alda Nielsdóttir
Disney hevur avgjørt, at restin av filmum teirra, sum verða útgivnir í ár, verða frumsýndir í biografunum, áðrenn teir verða tøkir á ymiskum stroymingartænastum. Tað upplýsti Disney fríggjadagin.
Disney hevur annars útgivið fleiri stórar filmar, m.a. Marvel-superhetjufilmin "Black Widow", har Scarlett Johansson spælir høvuðsleiklutin, á stroymingartænastu teirra, Disney+, samstundis sum filmurin varð vístur í biografunum.
Hetta fall hvørki í góða jørð hjá biografunum, sum hava mist inntøkur, ella hjá Scarlett Johansson, sum hevur stevnt Disney fyri sáttmálabrot.
Sambært henni framgekk í sáttmála hennara, at filmurin fyrst skuldi frumsýnast í biografunum. Løn hennara er nevniliga tengd at, hvussu væl filmurin klárar seg í biografunum, og við at gera filmin tøkan á Disney+ hevur hon mist ein stóran part av inntøkuni, sigur hon.
Les eisini: – Hetta er syrgiligt og ørkymlandi
Millum teir Disney-filmar, sum eftir ætlan verða frumsýndir í ár, er Marvel-filmurin "Eternals", Ridley Scott-filmurin "The Last Duel", og ein Steven Spielberg endurinnspæling av "West Side Story".
Nevndu filmarnir verða allir vístir í biografunum í 45 dagar, áðrenn teir gerast tøkir at stroyma, skrivar Ritzau.
Vinarliga broyt tínar kennifíla - og privatlívsstillingar fyri at síggja hetta innihald