Eurovision vælumtókt í Ísrael

(Tel Aviv): - Eurovision hevur altíð verið sera væl umtókt í Ísrael. Eg minnist, tá ið vit bert høvdu eina sjónvarpsrás, tá hugdu so gott sum øll eftir sendingini. Enn í dag, hóast at tað er so nógv annað at síggja, eru tað sera mong í Ísrael, sum trúliga fylgja við Eurovcision.

- Vit eru ein kappingarsinnað tjóð, so vit vilja vinna, sigur Dan Oryan og leggur afturat, at hann heldur, at Eurovision hevur knýtt Ísrael tættari at Europa.

- Ísrael er eitt fólkaveldi, og tað er júst frælsi, sum vit leggja dent á við hesi kapping.

- Tá ið okkum dámar so væl Eurovision, valdu vit fyri nøkrum árum síðani at skipa fyri tiltakinum Israel Calling, har luttakarar sleppa á pallin undan sjálvum Eurovision tiltakinum, greiðir Dan Oryan frá.

Sendimaðurin, sum ikki altíð hevur bæði beinini á jørðini, var fimleikari á ungum árum.

- Eg vandi miðvíst, og málið var, at eg ein dag skuldi gerast heimsmeistari.

Nú er Dan 57 ára gamal og málið er ikki longur at gerast heimsmeistari, men at hjálpa børnum við serligum tørvi.

- Eg var varasendimaður í Keypmannahavn í fimm ár. Í hesum sambandi hoyrdi eg um Føroyar. Eg havi hoyrt um vøkru náttúruna, vinarliga fólkið og nógvar góðar matstovur. Eg vóni at vitja í Føroyum um ikki ov langa tíð, kanska í samband við vælgerandi arbeiði fyri børn við serligum tørvi, sigur Dan.

Framførðslan hjá Reiley var einastandandi!

- Framførðslan hjá Reiley var einastandandi. Eg haldi, at tað ávirkaði meg, at vit fingu møguleika at tosa saman dagin áðrenn, og eisini tí at Reiley var so skjótur at bjóða seg fram at brúka eina løtu saman við børnum við serligum tørvi, sigur Dan Oryan við einum stórum smíli.