Agnar Prestá
Strandfaraskipið Hasfjord hevur havt ymiskar trupulleikar síðstu vikuna. Í gjár fekk Hasfjord eitt traktordekk um skrúvuna, tá leggjast skuldi at í Skopun. Girið fekk eisini skaða, og tað er ivasamt, júst nær Hasfjord, ið millum annað siglir við farmi, fer aftur í sigling.
Hetta hevur millum annað við sær, at eingin sigling er á leið 85, og at eykatúrar verða gjørdir á leið 60. Eykatúrarnir um Skopunarfjørð í dag og í morgin verða: Gamlarætt - Skopun 08:45 og 14:30 og Skopun - Gamlarætt 09:15 og 15:15.
Tað er Ternan, sum í løtuni siglir um Skopunarfjørð. Hon avloysir Teistan, sum mánadagin fór á beding. Hetta merkir, at Erla Kongsdóttir er á Nólsoyarleiðini, men orsakað av íkomnu støðuni skal Erla Kongsdóttir avloysa við siglingini millum Gomlurætt og Hest fyrrapartin. Harvið eru túrarnir av Tórshavn klokkan 09:30 og úr Nólsoy klokkan 10:30 fyribils avlýstur, sambært Strandferðsluni.
Fult yvirlit sæst á ssl.fo
Vinarliga broyt tínar kennifíla - og privatlívsstillingar fyri at síggja hetta innihald