Farsóttarøkið á føroyskar hendur

Farsóttarøkið varð flutt á føroyskar hendur nú á nýggjárinum, tá Fólkaheilsustýrið yvirtók umsitingina av farsóttarøkinum – sama dag sum stovnurin hátíðarhelt sín fyrsta føðingardag.

Í hesum sambandi verður móttøka í hølunum hjá Heilsumálaráðnum á Eirargarði 2, seinnapartin í morgin.

Fólkaheilsustýrið er ein sjálvstøðugur stovnur undir Heilsumálaráðnum, og fór formliga at virka 1. januar 2023, tá virksemið hjá Fólkaheilsuráðnum, Ílegusavninum og lutvíst Deildini fyri Arbeiðs- og Almannaheilsu varð savnað undir nýggja stýrinum.

Uppgávurnar hjá Fólkaheilsustýrinum kunnu skiljast sundur í nøkur yvirskipað øki:

• Ráðgeving og upplýsing
• Hagtøl og skráir
• Tilbúgving

Stigvíst verða fleiri nýggjar uppgávur lagdar til Fólkaheilsustýrið, og sum nevnt yvirtók stovnurin umsitingina av farsóttarøkinum frá landslæknaembætinum 1. januar 2024.

Les eisini: Farsóttarnevndin vald av nýggjum