Ferðsluátak í Norðurøkinum: 51 mál skrivað

Í gjár hevði ferðsluløgreglan eitt átak í Norðurøkinum, har bilar vórðu kannaðir millum klokkan 7.30 og 12.

Í hesum sambandi vórðu heili 51 mál skrivaði.

Í flestu førunum var talan um bilførarar, sum ikki høvdu koyrikortið uppiá sær, sum ikki sótu í trygdarbelti, og bilar við lyktufeilum.

Fýra fingu eisini klipp í koyrikortið fyri at hava børn í bilinum, sum ikki sótu í trygdarbelti, og tveir tosaðu í telefon, meðan tey koyrdu.

Hjá tveimum førarum var koyrikort teirra útgingið vegna aldur, og ein bilførari hevði einki koyrikort. Helst hevur hann eisini verið undir 18, sigur vaktleiðarin á politistøðini.

Onnur mál, sum vórðu skrivaði snúðu seg um niðurslitin summardekk, manglandi hondbremsu, ein viðfestisvogn uttan ljós, og rútar, har ísurin ikki varð skavaður av frammanundan.