Fimm ferðslumál órógvaðu páskafriðin

Tað hava verið eini friðarlig páskir hjá løgregluni. Hetta staðfestir vaktleiðarin á løgreglustøðini í Havn í morgun.

Tó kundi hann kunnað um nøkur niðurskrivaði mál seinasta samdøgrið. Øll fimm snúðu seg um ferðslu.

Trý av hesum vóru í Klaksvík - øll á sama vegi. 

Klaksvíkar kommuna er í gongd við eina royndarverkætlan, har Kráargøtu er einsrættað norðureftir, og Heygavegurin er einsrættaður suðureftir. Hetta er omanfyri fólkaskúlan í býnum. Kommunan vil gjarna broyta ferðslumynstrið við skúlan.

Sí eisini: Gera tveir vegir í Klaksvík einsrættaðir

Tað var á Kráargøtu, at tríggir bilførarar í gjár koyrdu "skeivan vegin". Teir koyrdu allir suðureftir, og hetta revsaði løgreglan við bæði bót á 1.500 krónur og klippi, staðfestir vaktleiðarin.

Tvey mál vóru um ferð 1. páskadag. Hetta var á strekkjum, har løgreglan javnan "fangar" fólk, sum koyra heldur skjótt. Á Søldarfjarðarvegnum koyrdi ein 74 km/t, og  Undir Kongavarða, á Glyvursvegum á Argjum, var málda ferðin 77 km/t. 

Í báðum førum var talan um bót.