Flaggdagshald í frástøðu í Runavík

- Í væl meira enn hálva øld hevur hald verið fyri Merkinum her í økinum, og síðani Nes Sóknar Musikkfelag skipaði seg við hornorkestri, í november mánaða 1962, hevur hornblástur, uttan slit, verið ein partur av degnum. 

Hetta verður ikki øðrvísi í Runavíkar kommunu í ár, nú boðað verður frá, at 80 ár eftir at Merkið fekk viðurkenningina sum tjóðarmerki okkara, verður flaggdagshald.

Umstøðurnar í ár eru øðrvísi enn tær plaga at vera, tí koronafarsóttin herjar,og mælt verður tí frá, at fólk hittast í ov stórum tali. Runavíkar kommuna valdi tó ikki at avlýsa ætlaða flaggdagshaldið, men at halda tað eftir tilmælunum. 

- Hildið var kortini ikki, at ein so týðandi dagur fyri allar føroyingar, líkamikið hvar á klótuni teir búgva, og hvørja hugsan hvør einstakur hevur inni við seg sjálvan, um stórt og smátt, kundi fara aftur við borðinum - Merkið er evsta savningarmerki okkara alra.

Mouritz Mohr flytur fram røðu við Røktar- og Ellisheimið - senda beinleiðis

Flaggdagshaldið hjá Runavíkar kommunu verður leygardagin 25. apríl kl. 15. Tað verður í túninum omanfyri Røktar- og Ellisheimið í Runavík, og verður fyrst og fremst hildið fyri búfólkunum á heiminum. Tað verður sent landsfevnandi beinleiðis á R7, og haldið verður eisini sent á Facebook-síðuni hjá Runavíkar kommunu.

Tað er skipasmiðjustórjin Mouritz Mohr, ið flytur fram røðu.

Nakrir fáir hornblásarar frá Nes Sóknar Musikkfelag fara, í hóskandi frástøðu, at spæla, eftir at røðan er flutt fram, og flaggsangurin verður sungin. Av trygdarávum verður ongin skrúðgonga hendan dagin - bert ein flaggberi, boðar Runavíkar kommuna frá.

Annika Olsen, borgarstjóri í Havn, gjørdi mánadagin greitt, at flaggdagshald eisini  verður í høvuðsstaðnum leygardagin.