Fleiri hundrað fílar deyðir í summar: Orsøkin er nú funnin

Fyrst í juli vórðu fílar í hópatali funnir deyðir í afrikanska landinum Botswana. Ógreitt var, hvat deyðsorsøkin var, men illgruni var um, at ein sjúka gekk í fílastovninum.

Les eisini: Nógvir hundrað fílar deyðir av ókendari orsøk

Nú er komið fram, at cyanobakteriur vóru orsøkin. Granskarar hava nevniliga funnið bakteriurnar í drekkivatninum hjá teimum.

Í minsta lagi 350 fílar vórðu funnir deyðir, og líkini vóru enn órørd, so hildið varð ikki, at talan kundi vera um veiðisníkar.

Landsdjóralæknin í Botswana, Mmadi Reuben, sigur sambært Reuters, at hóast orsøkin nú er funnin, standa tey enn spyrjandi.

Hví tað bert vóru fílar, sum doyðu, og hví tað bert hendi í ávísum økjum er ógreitt, men tey hava tó fleiri hypotesur.

Botswana hevur heimsins størsta fílastovn. Mett verður, at eini 130.000 fílar eru í landinum.