Føroya Arbeiðsgevarafelag: Røtt gongd í kommunuskattinum

Føroya Arbeiðsgevarafelag fegnast um at seks kommunur hava valt at lækka kommunuskattin, og at 11 kommunur hava hækkað barnafrádráttin fyri 2025.

– Føroya Arbeiðsgevarafelag hevur leingi víst á tørvin at javnseta og lækka føroyska persónskattin. Tað er tí at fegnast um, at seks kommunur hava valt at lækka kommunuskattin og at 11 kommunur hava valt at hækka barnafrádráttin fyri 2025.
Slíkar broytingar eru viðvirkandi til at gera føroyska persónskattin og arbeiðsmarknaðin meira kappingarføran, skrivar felagið á heimasíðuna hjá Vinnuhúsinum.

At seks kommunur hava valt at lækka kommunuskattin hevur við sær, at miðalkommunuskatturin lærrar úr 20,2% niður í 19,97%. Samstundis hækkar miðal barnafrádrátturin úr 8.036 kr/barn upp í 8.471 kr/barn.

Hóast talan ikki er um kollveltandi broytingar, fegnast Føroya Arbeiðsgevarafelag tó um, at gongdin í kommunuskattinum er røtt, og at miðal kommunuskatturin nú fyri fyrstu ferð í nógv ár er komin niðurum 20%-markið. Til samanberingar var miðal kommunuskatturin í 2015 omanfyri 21%.

– Vónandi heldur gongdin við lækkandi kommunuskatti og hækkandi barnafrádrátti fram í komandi árum, og tekur meira dik á seg, so Føroyar gerast meira kappingarførar, skrivar Føroya Arbeiðsgevarafelag.