Føroyingur í havsneyð einsamallur í seglbáti

Í gjár var sóknast eftir einum føroyingi, sum var einsamallur á veg í seglbáti úr Haugesund í Noregi til Føroya. Hann skuldi verið komin til Hetlands fríggjadagin, men kom ikki fram.

Í nátt fann hetlendska bjargingartænastan seglbátin og sleipaði hann til Hetlands, veit Kringvarpið at siga í morgun.

Talan er um seglbátin Camalui, sum er skrásettur í Vejle í Danmark. Hann fór úr Haugseund í Noregi mikudagin. Tá hann ikki kom fram sum ætlað, varð ein leiting sett í verk í gjár.