Tíðindaskriv
Avtalan er liður í verkætlanini Miklamálgrunninum, sum hevur til endamáls at savna saman stórar mongdir av føroyskum teksti til ymisk endamál. Hesin tekstagrunnurin kann t.d. verða brúktur til at menna máltøknilig amboð fyri føroyskt og í sambandi við gransking av føroyskum máli.
Forlagið Fróðskapur hevur í nógv ár givið út føroysk vísindalig verk og bøkur. Við hesi avtaluni letur Fróðskapur Máltøknideplinum tilfar, sum í orðfeingi, málburði og viðgjørdum evnum ríkar um tekstagrunnin. Slíkar avtalur tryggja, at menningin av føroyskari máltøkni er grundað á breitt og fjølbroytt tilfar, har serligur dentur verður lagdur á føroyskar orðingar, setningar og fjølbroytta málnýtslu.
Annika Sølvará, stjóri fyri Fróðskap, sigur soleiðis um avtaluna:
- Forlagið Fróðskapur tók í 2005 yvir útgávuvirksemið, sum Fróðskaparfelagið stóð fyri frá stovnanini í 1950'unum til 2005. Eitt av høvuðsmálunum hevur verið at menna føroyskt vísindamál.
- Seinastu árini hava vit víðkað okkara virksemi við einum talgildum palli. Vit fegnast um at kunna loyva Máltøknideplinum at brúka talgildar útgávur hjá Fróðskapi til at menna máltøkniamboð okkum øllum at frama.
Máltøknidepilin er í holt við at fáa fleiri slíkar avtalur í lag við onnur forløg og útgevarar, soleiðis at Miklamálgrunnurin verður so umboðandi sum gjørligt, føroyskum máli og føroyingum at gagni.
Tilfarið, sum Fróðskapur hevur givið Máltøknideplinum loyvi at brúka, er at finna á ojs.setur.fo
Fróðskaparsetur Føroya
Vinarliga broyt tínar kennifíla - og privatlívsstillingar fyri at síggja hetta innihald