Fyrsti dagur við minking av smittaðum

Samlaða talið av smittaðum fór frá 115 og upp á 118 í morgun, tá myndugleikarnir kunngjørdu nýggjastu upplýsingarnar. Sostatt eru tríggjar kanningar, sum vóru positivar við covid-19 í gjár.

Hinvegin fór talið av frískum frá 14, og upp á 23 fólk.

Tað vil siga, at vit, fyri fyrstu ferð síðani fyrsti tilburðurin av koronavirusinum varð skrásettur í Føroyum, hava eina minking av smittaðum í løtuni. Tað sum á enskum verður rópt “active cases”. Hetta talið er farið frá 101 fólkum við smittuni til í morgun at vera 95 fólk.

Á hagtalssíðuni á Portalinum, sum eisini er at síggja niðanfyri, sæst positiva gongdin. Enn er ov tíðliga at gera nakra niðurstøðu, men vit kunnu øll vóna, at góða gongdin heldur fram.