Fysiskar blokadur eru ólóglig stríðsstig

Føroya Arbeiðsgevarafelag hevur sent teimum fýra arbeiðarafeløgunum í verkfalli hvør sítt skriv um, at tað er ólógligt stríðsstig at forða fyritøkum í at gera sítt lógliga arbeiði.

Fysiskar blokadur eru ólógligt stríðsstig. Tað hevur Føroya Arbeiðsgevarafelag gjørt teimum fýra arbeiðarafeløgunum púra greitt í einum skrivi, sum er sent teimum í dag.

Seinastu dagarnar eru fleiri dømi um, at tey fýra arbeiðarafeløgini í verkfalli, hava blokerað lógliga arbeiðið hjá fyritøkunum.

- Tað er eitt ólógligt stríðsstig sambært fleiri dómum í bæði hægstarætti og landsrætti. Um skipað verður fyri einari ólógligari fysiskari blokadu, sum geva teimum ávirkaðu fyritøkunum ein fíggjarligan miss, kunnu bæði feløgini, nevndarlimirnir í feløgunum og tey sum luttaka í ólógligu blokaduni, gerast endurgjaldsskyldug, sigur Føroya Arbeiðsgevarafelag.