Gull – Tórshavnar Big Band í fimmti ár

Nýggjasta heildarútgávan hjá Tórshavnar Big Bandi við heitinum “Gull” er nú tøk á øllum stroymingarpallum. Útgávan er 50 ára fagnaðarútgáva hjá Tórshavnar Big Bandi.

Hetta er onnur útgávan hjá Tórshavnar Big Bandi, tann fyrra kom út í 2011 undir heitinum “Úr Sangskattinum”.

Verkini sum eru á hesi útgávu eru úrtslit av kapping sum Tórshavnar Big Band skipaði fyri í 2020.

At heiti á útgávuni er “Gull” kemst av at Tórshavnar Big Band í 2022 kundi hátíðarhalda at tað vóru 50 ár síðani orkestrið bleiv sett á stovn.

Lag, tónasmiðir og høvundar eru :

“Tornarunnir tankar” – Dania O. Tausen (orð)  Magnus Johannessen (lag)
“Burtur” – Kinna Poulsen (orð) Herluf Lutzen (lag)
“Nýggja árið” - Rógvi á Rógvu (orð & lag)
“Sólsetur” – J. H. O. Djurhuus (orð) Páll Sólstein (lag) Andras S. Olsen (úrseting)
“Har einki er” – Hans Jacob Kollslíð (orð) Heðin Z. Davidsen (lag)
“Skutarin” – Marita B. Atladóttir (orð) Atli K. Petersen (lag)
“Vælkomin heim” – Martin Joensen (orð) Ólavur Ey. Gaard (lag)
“Buksurnar á” – Dania O. Tausen og Eyðfinn Lamhauge (orð) Magnus Johannessen (lag)

Upptøkur, framleiðslu og mastring tók Finnur Hansen sær av.

Upptøkurnar vóru gjørdar í Hátúni í Tórshavnar Musikkskúla.

Søgan hjá Tórshavnar Big Bandi

Tórshavnar Big Band sá dagsins ljós í 1972, sum tað fyrsta big bandið í Føroyum nakrantíð.

Saxofonleikarin og tónleikalærarin, Brandur Øssursson, setti orkestrið á stovn. Brandur Øssurson var ein sera aktivur partur á føroyska tónleikapallinum í mong ár. M.a. í Havnar Jazzfelag, ið var virkið frá 1975 til 1983, og aðrastaðni. Hann var eisini stigtakari til Tórshavnar Jazz-, Fólka- og Blues Festival, ið var hildin fyrstu ferð í 1984. Festivalurin bleiv á mangan hátt ein mentanarstovnur í Føroyum, sum frá 2004 gjørdist ein liður í árliga tiltakinum Summartónar.

Tórshavnar Big Band var í fleiri ár húsorkestur í V4-sendingunum, ið m.a. vórðu sendar beinleiðis úr auluni á Føroya Læraraskúla í 1970’unum.

Tá Skansastova í 1988 varð tikin í nýslu sum undirvísingarstað í rútmiskum tónleiki hjá Tórshavnar Musikkskúla, bleiv Skansastova av sær sjálvum nýggi heimstaðurin hjá Tórshavnar Big Bandi.

Tey árini, ið Tórshavnar Jazz, Fólka- og Blues Festival var til (1984-2003), gjørdist orkestrið sera virkið, oftast við egnari skrá ella sum húsorkestur, tá útlendskir solistar komu til festivalin. Hesin festivalur gjørdist karmur um nógv stór big band átøk, og Tórshavnar Big Band var ofta partur av skránni.

Nakrir av solistunum og dirigentunum, ið hava vitjað Tórshavnar Big Band eru: Dirch Passer, Tor Ytredal, Jens Klüver, Eero Koivistoinen, Jesper Thilo, Butch Lacy, Bjarne Tanning , John Højbye o.fl.

Tórshavnar Big Band hevur gjøgnum árini virkað undir fleiri nøvnum sum t.d : Tórshavnar Stór Band, Jazzarnir, Tor Ytredal Big Band, Jaspis, Stórbandittarnir og Skansa Big Bandið.

Síðani 2009 hevur orkestrið virkað undir navninum Tórshavnar Big Band. Hetta sama ár fylti Tórshavnar Kommuna 100 ár sum fólkavald kommuna, og tað var tað í hesum sambandi at Tórshavnar Kommuna keypti Magnus Johannesen til at útseta 10 havnaløg til Tórshavnar Big Band, og komu øll hesi løg út á fløgu tvey ár seinni, í 2011.

Síðani 2016 hevur orkestrið havt regluligt virksemi við tveimum til trimum verkætlanum árliga.

Næsta verkætlan hjá Tórshavnar Big Band er at framføra eina heila konsert við tónleiki og útsetingum hjá Count Basie. Konsertin verður 18 oktober í Løkshøll. 

Myndir frá upptøkunum, sum fóru fram í Hátúni í Tórshavnar Musikkskúla