Helgi Dam Ziska setur ólavsøkuna seinnapartin

Sum siður er, verður ólavsøkan sett við stórum tiltaki á Vaglinum seinnapartin, har røða er á skránni.

Nógv ymisk fólk hava hildið ólavsøkurøðuna gjøgnum árini - millum annað politikkarar. Í ár er tað ein, sum hevur umboðað Føroyar nógv í leiki og sum hevur serstakt heiti.

Havnarmaðurin Helgi Dam Ziska hevur leingi gjørt vart við seg í talvheiminum. Hann vísti hegni og dygdir á ungum aldri, og í 2016 gjørdist hann fyrsti føroyingurin, sum vann sær heitið sum stórmeistari í talvi.

Nýggjasta styrkismetingin, eftir árligu landsmeistarakappingarnar í talvi fyri einstaklingar í øllum Norðanlondunum eru av, vísir, at Helgi í løtuni er næstovast av teimum norðurlendsku meistarunum.
 

Helgi hevur tikið útbúgving á lærda háskúlanum í Edinburgh. Til dagliga er hann kredittráðgevi hjá Betri Banka.

Helgi Dam Ziska fylti 32 ár í gjár, og í dag fær hann heiðurin at seta ólavsøkuna 2023.

Hetta er eftir, at skrúðgonga við hornblásarum, ítróttafólki, býráðslimum, hestum og reiðfólki er komin oman á Vaglið. Gingið verður úr Tróndargøtu við Finsen klokkan 14.

Tað verður heæst heldur váttligt, sambært veðurforsøgnini. Kringvarpið sendir frá skrúðgonguni og setanini frá klokkan 13.55. Sí alla ólavsøkuskránna her


Hallur Holm setti ólavsøkuna í 2021 (Mynd: Jens Kr. Vang)