Herborg og Steintór spæla føroyskt fríggjakvøldið

At spæla føroyskt uttan Herborg og Steintór’sa sangir, er sum tveir kassagittarar uttan streingir.

Nú fara tey javnlík á pallin saman. Aftur at sær hava Herborg Torkilsdóttir og Steintór Rasmussen eitt vakurt tyssi av dugnaligum tónleikarum;  Pætur við Keldu, klaver, Rakul Petersen, gittar, Vár Miðberg, trummur, Kim Hansen, harmonika og Elin Maria Hansen, bass.

Á Reinsarínum fríggjakvøldið verður tað ein blandaður bunki av góðum, gomlum, kendum og nýggjum sangum, sum fara at mala í heimagjørdu kvørnini.  

Herborg og Steintór hava í sínum nógvu og vældámdu sangum sett orð á hvussu føroyingar liva, virka, droyma, stríðast og elska.   

Fríggjakvøldið  fara tey at syngja og skriva søgu saman.