Herverk í Viðareiðistunlinum í nátt

Løgreglan fekk í nátt fráboðan um herverk í Viðareiðistunlinum.

Onkur hevði brotið ein rút í eini hurð í tunlinum, og viðkomandi hevði eisini latið tvær hurðar upp á neyðskápunum. Og har var okkurt gjørt so at bummarnir fóru niður. Men av tí at hetta hendi í nátt, so var ferðslan ikki stórvegis tarnað.

Løgreglan kannar nú málið, og hevur møguliga onkur spor at ganga eftir.

Eisini var sløkkiliðið boðsent til Viðareiðis í nátt. Har var ein brandalarmur farin í gongd á smoltstøðini, men tíbetur vísti tað seg, at tað ikki var eldur í.

Løgreglan hevur eisini klipt nummarplátur í nátt hjá nøkrum av teimum, sum enn ikki hava goldið vegskatt. Akstovan lat 9. oktober løgregluni 592 mál um vegskattaeftirstøður. Í nátt tók løgreglan millum 10 og 20 nummarplátur.