Høgni vísir á Aksel

Í morgun er formansumfar í løgtinginum, har formenninir í politisku flokkunum siga løgtingsformanninum, hvønn teir peika á sum samráðingarleiðara, nú ið nýggj samgonga skal skipast.

Javnaðarflokkurin og Sambandsflokkurin hava frammanundan víst á Aksel V. Johannesen, og tað hevur Tjóðveldi nú eisini gjørt. Tjóðveldi hevur havt eitt gott samstarv við verandi andstøðuflokkar, og tað er eitt gott boð upp á eina sterka samgongu.

Annars kann Aksel Johannesen eisini kalla teir flokkar inn, sum hava víst á hann sum samráðingarleiðara og vita, um tað gevur nakað grundarlag fyri einum samgongusamstarvi.

Beinir Johannesen, formaður í Fólkaflokkinum, vildi ikki siga, hvønn ið hann vísti á, men bara, at tað var tann, sum gav flokkinum besta møguleikan at koma í samgongu.

Men nú tykist alsamt meiri sannlíkt, at tað verður Aksel V. Johannesen, sum verður samráðingarleiðari.