placeholder
Innanlands

Høvuðsstaðurin fer við meira enn helvtini av fólkavøkstrinum

Lutsfalsliga er størsti vøksturin í Vágum og størsta minkingin í Koltri

Tórshavn (Mynd: Hagstovan)

Tórshavn (Mynd: Hagstovan)

2020-05-11 16:59 Author image
Alda Nielsdóttir
placeholder

Í tíðarskeiðnum 1. apríl 2019 – 1. apríl 2020, er fólkatalið vaksið við 856 fólkum, og av teimum eru 435 í høvuðsstaðarøkinum, skrivar Hagstovan.

Sostatt fer høvuðsstaðarøkið við meira enn helvtini av fólkavøkstrinum – 51 prosent, hóast bert 39 prosent av øllum fólkinum í Føroyum búgva har.

Í mun til fólkatalið er talan um ein vøkstur á 2,2 prosent.

Um alt landið er tað serliga høvuðsstaðurin, Eysturoyggin og Vágar, sum fara við størsta fólkavøkstrinum bæði tá talan er um lutfalsligan vøkstur og talið á fólkum.

Les eisini: Størsti vøksturin var í høvuðsstaðarøkinum

Í Eysturoynni búgva 23 prosent av fólkinum í Føroyum, og vøksturin har svarar til 24 prosent av samlaða fólkavøkstirnum. Í Norðoyggjum búgva 12 prosent av fólkium, og og har svarar fólkavøksturin til 10 prosent av samlaða vøkstrinum fyri alt landið.

Í Vágum búgva stívliga 6 prosent av fólkinum, men vøksturin har svarar til 8 prosent av samlaða vøkstrinum. Í Suðuroynni búgva 9 prosent av fólkinum, men fólkavøksturin har svarar bert til gott 1 prosent av samlaða vøkstrinum.

Tórshavnar og Runavíkar kommuna hava størsta vøksturin

Tá hugt verður eftir einstøku kommununum, er størsti vøksturin í tali í Tórshavnar kommunu og Runavíkar kommunu.

Vøksturin í Tórshavnar kommunu er 459 fólk (2,1 prosent), og vøksturin í Runavíkar kommunu er 98 fólk (2,4 prosent). Fólkatalið í Klaksvíkar kommunu er vaksið við 84 (1,6 prosent).

Vøksturin í Sørvágs kommunu er lutfalsliga størri (3,8 prosent), hóast talið á fólkum er nakað minni.

Í Eysturoynni er lutsfalsliga størsti vøksturin í Eiðis kommunu (3,2 prosent), og í Norðoyggjum er tað Kunoyar kommuna (5,4 prosent).

Í Skopunar kommunu og Viðareiðis kommunu er talan tó um eina minking. Í Skopun er talið minkað 2,3 prosent, og í Viðareiði 3,1.

Í Suðuroynni er vøkstur í Tvøroyar kommunu men minking í Hovs kommunu.

Minking í Koltri og Hesti

Tá hugt verðu eftir útoyggjum, er Hestoy minkað 5,3 prosent, og í Koltri býr eingin longur, og sostatt er fólkatalið har sambært yvirlitinum minkað 100 prosent.

Í Nólsoynni er talið vaksið 3,6 prosent, og Í Kalsoynni 1,4. Í Svínoy er vøksturin 10,7 prosent, í Mykinesi 14,3 prosent. Í Skúvoy og Stóra Dímun er eingin broyting.

Av stóru oyggjunum er størsti vøksturin í Streymoy og Eysturoy, men lutfalsliga er vøksturin størri í Vágum.

Les meira her.

placeholder
placeholder