23. februar legði Jógvan Skorheim frá sær sum formaður í Sjálvstýri, samstundis sum hann boðaði frá, at hann meldaði seg úr flokkinum, men komandi vikuna skal hann kortini taka sæti í løgtinginum fyri Sjálvstýri.
Orsøkin er, at einasti tingmaðurin í flokkinum, Kristin Michelsen, fer í farloyvi í eina viku, og er fyrrverandi formaðurin næstvaldur á listanum.
Jógvan Skorheim situr annars í býráðnum í Klaksvík sum uttanflokkamaður í løtuni.
Jógvan Skorheim heldur tað ikki vera løgið, at hann nú tekur sæti á tingi fyri tann flokkin, sum hann fyri tveimum mánaðum síðani meldaði seg úr.
Á middegi segði hann í samrøðu við Útvarpið, at hann roknaði seg sjálvan sum uttanflokkatingmann, men at sjónarmiðini framvegis eru tey somu.
– Eg umboði tey sjónarmiðini, sum eg havi havt, eisini til valið, og eg umboði tey sjónarmiðini, sum eg havi havt sum persónur.
Vinarliga broyt tínar kennifíla - og privatlívsstillingar fyri at síggja hetta innihald