Jólakonsert í Ebenezer komandi leygardag

Leygardagin 17. desember bjóðar samkoman í Ebenezer inn til jólakonsert.

Talan er um trý tiltøk. Klokkan 16 syngja barnakórini í samkomuni á Ebenezertrappuni, klokkan 17 er stóra jólakonsertin við Ebenezerkórinum, Regini Guttesen, Mariu á Lakjuni, og Sigrun av Reyni, og eftir konsertina, uml. klokkan 18.30, verður opið hús.

– Tað er okkum ein stór gleði, aftur at kunna bjóða inn til jólakonsert, eftir at tað ikki hevur verið møguligt seinastu árini, siga tey í Ebenezer.

– Vit vóna at síggja nógv fólk, bæði til konsertina og at nógv støkka inn á gólvið til ein kaffimunn og jólahugna eftir konsertina.