Listi Á – nýggjur listi í Eysturkommunu

Undir slagorðinum “Áfram Eysturkommuna” stilla átta valevni upp á nýggjum borgaralista til kommunustýrisvalið í Eysturkommunu.

Hesi stilla upp á listanum, sum hevur Á sum bókstavaheiti:

Benjamin Tvørfoss, Norðragøta

Fríðgerð Heinesen, Leirvík

Hanna Jensen, Norðragøta

Tummas E. Justinussen, Leirvík

Hákun Andreasen, Leirvík

Maj-Britt Winther Hentze Jacobsen, Norðragøta

Jón Tyril, Norðragøta

Rúni Justinussen, Syðrugøta

Í Eysturkommunu og undan tí í Gøtu kommunu hevur verið stillað upp politiskt. Men við nýggja bókstavaheitinum tykist sum um ynskið er at sleppa burtur frá tilknýtinum til verandi politiskar flokkar.

Fýra av fólkunum á hesum listanum, Fríðgerð Heinesen, Hanna Jensen, Hákun Andreasen og Jón Tyril stillaðu upp seinast á listanum hjá Framsókn, lista F. Seinast fekk listi F eitt umboð í kommunustýrið. Tað er Hanna Jensen, fyrrverandi ting- og landsstýriskvinna.

Í fráboðanini til miðlarnar frá lista Á verður listin ikki settur í samband við nakran politiskan flokk, men tey siga seg vilja leggja dent á at fríðka, umhvørvið og at borgararnir skulu takast meira við upp á ráð. Eisini vilja tey arbeiða fyri at kvinka skattatrýstið í kommununi niðureftir.