Magna hevur tikið sæti á tingi

Eiðiskvinnan Magna Eliana Mørkøre hevur í dag tikið sæti á løgtingi fyri Javnaðarflokkin. Hon avloysir Jóhannes Joensen, sum er farin í farloyvi.

Hesum boðar Javnaðarflokkurin frá í stuttum skrivi í dag.

Magna er 37 ára gomul, sjúkrarøktarfrøðingur og arbeiðir sum dygdarmennari í VEKS. Magna er eisini virkin í skúlaarbeiði, har hon millum annað er forkvinna í skúlastýrinum í Eiðis skúla og nevndarlimur í Heim og skúli.

Á løgtingsvalinum í 2022 fekk Magna Eliana Mørkøre 157 atkvøður. Hon sat á á tingi í tíggju dagar í fjør, tá Kim Durhuus var í farloyvi.

Jóhannes Joensen verður í farloyvi í eina viku.