Malin Zachariassen við nýggjari tónleikaútgávu

“Fyri meg er Gud undranarverdur. Tað er hetta, ið eg fegin vil vísa á, gjøgnum sangirnar á nýggju útgávuni”.

Soleiðis sigur Malin Zachariassen, sum fríggjadagin kemur úr við síni triðju tónleikaútgávu. Útgávan ber heiti ’Undranarverdur’. Her lýsir hon við egnum orðum og løgum júst undran sína á alt tað góða, ið Gud gevur okkum menniskjum.

Á útgávuni eru 14 sangir, sum eru framleiddir í Føroyum, Danmark og í Svøríki. Nógvir góðir tónleikarar og sangarar eru við á útgávuni, millum annað føroyski maður hennara, Jan Zachariassen, sum spælir bass og gittar á øllum sangunum.

Tekstirnir á útgávuni eru upprunaliga skrivaðir á svenskum, men eru síðani týddir til føroyskt av Onnu D. Háberg.

Í sambandi við útgávuna, verður konsert í Østrøm fríggjakvøldið 2. august, har møguleiki verður at ogna sær fløguna.

Nevnast kann eisini, at Malin syngur til gudstænastuna í Viðareiðis kirkju sunnudagin.

Sum nevnt, er hetta triðja útgávan hjá Malin. Tann fyrsta útgávan, ’Drekk av vatninum’ kom út fyri 20 árum síðani, og tann næsta, ’Eg vil fylgja’, í 2003.