Meinhard Bjartalíð fer at prædika við bátahylin Niðri við Støð

Nú guðstænastur ikki kunnu vera inni jólaaftan, orsakað av almennu tilmælunum, hava krikjusóknir, samkomur o.s.fr kring landið funnið uppá ymsar øðrvísi loysnir.

Hetta inniber, í øllum dømunum, at eitt slag av guðstænastu verður uttandura - í Miðvági er tað til dømis sum drive-in - og á eystara armi á Skálafjørðinum er einki undantak.

Les eisini: 
Eingin innandura guðstænasta jólaaftan og jóladag
Uttandura jólagudstænastur í Klaksvík og á Toftum
Kirkjurnar í høvuðsstaðnum skipa fyri uttandura guðstænastum jólaaftan

Kirkjan á Glyvrum er ein av teimum, sum vanliga er fullsett, tá kallað hevur verið til guðstænastu jólaaftan, men tá farsóttarstøðan forðar fyri hesum í ár, hevur nevndin í Grinkilsgrunninum tikið stig til eitt øðrvísi tiltak.

Í tíðindaskriv boðar Grunnurin “Grinkil – FD 563” frá, at stutt jólaløtu verður við bátahylin Niðri við Støð á Glyvrum í morgin, jólaaftan klokkan 15. Har fer Meinhard Bjartalíð at prædika frá heldur øðrvísi staði enn vanligt:

- Ætlanin er at leggja motorin ”Grinkil” út í bátahylin Niðri við Støð, og haðan fer sóknarpresturin Meinhard Bjartalíð at prædika. Lutfalsliga stórar víddir eru kring um hylin, soleiðis, at ein fjøld av fólki kann standa spjadd í økinum, og skipað verður soleiðis fyri tøkniliga, at boðskapur og sangur hoyrast um alt økið. Áðrenn prædikuna syngja vit “Tað sótu seyðamenn á vakt” og “Føgur er foldin” og við lok løtunar – eftir prædiku Meinhards - syngja vit “Gleðilig jól.”

Skriva verður til seinast, at nú ráðini gingu ímóti at vera innandura yvirhøvur, kann hetta vónandi – í minni og øðrvísi mun – geva  kensluna av, at ein av stóru kristnu hátíðunum stendur framman fyri durðum okkara.