Meting av ES-limaskapi hjá Ukraina klár í komandi viku

Í komandi viku hevur ES eina meting klára av umsóknini hjá Ukraina um ES-limaskap. Tað sigur Ursula von der Leyen, forkvinna í ES-nevndini, sum hetta vikuskiftið hevur vitjað í ukrainska høvuðsstaðnum Kyiv.

Í gjár umrøddi hon málið við Volodymyr Zelenskyj, forseta í Ukraina, og á felags tíðindafundi í gjár segði hon, at metingin av umsóknini hjá Ukraina kann væntast at vera klár áðrenn endan av næstu viku.

Hetta er fyrstu ferð, at ES-leiðslan hevur sagt nakað um, nær Ukraina kann vænta sær at fáa hesa meting, sum tó bert er fyrsta stig í einari langari tilgongd. Millum annað skulu øll 27 ES-londini vera samd um, hvørt Ukraina kann gerast ES-land, og sambært Ritzau eru deildar meiningar um hetta.

Pólland og baltisku londini hava boðað frá, at tey stuðla Ukraina í ætlanini um at gerast ES-land, meðan eitt nú Eysturríki, Týskland, Frakland og Holland eru meira ivasom.

Ursula von der Leyen og Volodymyr Zelenskyj á tíðindafundi í gjár (Mynd: EPA)

Á tíðindafundinum í gjár minti von der Leyen eisini Zelenskyj á, at hóast Ukraina hevur gjørt framstig, hevur Ukraina framvegis eitt stórt arbeiða fyri framman. M.a. er framvegis brúk fyri nýskipanum ímóti korruptión.

Tað eru bert tríggir mánaðir síðani, at Ukraina søkti um ES-limaskap – hetta var stutt eftir, at Russland hevði gjørt innrás í landinum. Vanliga tekur tað upp til hálvtannað ár hjá ES at meta um, hvørt eitt land møguliga kann gerast ein partur av ES.

Eftir ætlan skal ES taka støðu til ynskið hjá Ukraina um at gerast partur av felagsskapinum 24. og 25. juni, tá leiðarar í ES-londunum hittast á toppfundi í Brússel.