Myndir: Nýggi terminalurin hjá Smyril Line

Tað verður um ein sermerktur bygningur, sum havnarfólk fáa sum útsýni, tá tey hyggja oman móti havnarlagnum í framtíðini.

Skjótt verður farið í gongd við at byggja nýggja farstøð til Smyril Line, og talan verður um ein serligan bygning, sum viðurkenda danska teknistovan Henning Larsen, við deild í Syðrugøtu hevur teknað.

Myndir av komandi terminalinum eru nú almannakunngjørdar á altjóða arkitektatíðamiðlinum archdaily.com, sum roknar við, at sjálvur bygningurin verður ein komandi attraksjón hjá ferðafólkum eisini.

Í skapi er bygningurin ikki ólíkur operahúsinum í norska høvuðsstaðnum Oslo, sum eisini liggur oman móti sjónum og bygt soleiðis, at møguleiki er hjá fólki at ganga heilt upp á takið. Tó kemur bygningurin í Havn at hava timburklædning fyri at tekkjast gamla føroyska byggisiðinum.

- Okkara sniðgeving skal vera vitnisburður um føroyska vakurleikan og maritima arvin. Timburið við sínum vøkru linjum, heintar íblástur frá føroyska bátinum og eisini frá søguligu timburbygningunum rundan um gomlu havnina, sigur Ósbjørn Jacobsen, sum er leiðari fyri teknistovuni hjá Henning Larsen í Syðrugøtu og hevur staðið fyri arbeiðinum.

Nýggja farstøðin úti á molanum skal tæna trimum endamálum. Umframt at vera farstøð, skal bygningurin vera høvuðssæti hjá Smyril Line og eisini farmaterminalur.

Archdaily ger eitt sindur burturúr, at við nýggju farstøðini fáa havnarfólk aftur atgongd út á molan. Fyrr var tað jú vanligt at ganga kaitúr út á molan á Eystaru vág, men forðing varð sett fyri hesum í sambandi við nýggjar Schengen-reglugerðir.